محمية أشتوم الجميل هي واحدة من أهم المحميات الطبيعية في مصر و أكبرها … تمتد على مساحة 171 كيلومتر مربع. المحمية كمان عريقة جدا .. تم إعلانها كمحمية سنة 1998 وهي ليها اهمية بيئية عالمية عشان كده هي من ضمن الاماكن في اتفاقية رامسار ودي اتفاقية هدفها الحفاظ على الموائل الطبيعية و الأراضي الرطبة للحيوانات
المحمية بتضم كذا منطقة مع بعض (اشتوم الجميل .. جزيرة تنيس .. بحيرة المنزلة)
المحمية بتتميز بتنوعها البيولوجي الفريد وده لإنها موطن ومأوى لاتواع كتير جدا من النباتات والحيوانات والطيور المائية والمهاجرة.
طبعا بما انها محمية فا نركز اول حاجة على الجوانب البيئية:
1. تنوع بيولوجي: المحمية فيها مجموعة من الموائل الطبيعية لأنها ببساطة بتضم البر والبحر ، واللي بتوفر بيئة مثالية للعديد من الأنواع النباتية والحيوانية.
المحمية بتضم 77 نوع نبات منها 23 نوع حولي يعني بيزدهروا في أوقات معينة من السنة و 54 نوع معمر
المحمية سجلت 263 نوعًا من الطيور، منها 64% طيور مائية زي النورس اسود الرأس و بط الكيش و36% طيور أرضية زي عصفور الدوري
وبالنسبة للاسماك
.. فبحيرة المنزلة اللي تعتبر جزء من المحمية بتنتج سنويا 60 الف طن سمك من أنواع مختلفة ما بين اسماك الماء العذب واسماء الماء المالح
حد ييجي يسأل ويقول ازاي بحيرة فيها اسماك ماء عذبة … سؤال ممتاز
.. اقولك بقى ازاي
البحيرة بتتميز بوجود بوجود شوية بواغيز(بوغاز اشتوم الجميل القديم و بوغاز اشتوم الجديد) و دي المنطقة اللي بتوصل الماء العذب بالمالح و بتوصل بين الترع والبحيرة
و من ضمن انواع السمك اللي في المحمية
سمك السردين و سمك موسى اللي بيعيش في المياة المالحة
و سمك البوري و الطوبارة و الحنشان اللي ممكن يعيشوا في المياة المالحة أو العذبة
و سمك البلطي اللي بيعيش في المياه العذبة
3. حماية الطيور
: تعتبر المحمية محطة مهمة للطيور المهاجرة عشان بتوفر الغذاء والمأوى ليها خلال رحلتها الطويلة. كمان بتساهم في الحفاظ على التوازن البيئي من خلال حماية الأنواع المهددة بالانقراض.
و زي ما قولنا فوق .. المحمية فيها 263 نوع ما بين الطيور المهاجرة والطيور المقيمة
4. الغطاء النباتي 
: المحمية فيها على حوالي 77 نوع نبات منها أنواع نادرة ومهمة بيئيًا ، زي النباتات اللي بتعتمد على تخزين الهواء في أنسجتها للبقاء في البيئات المالحة.
و انواع النباتات المختلفة دي بتعيش في مواطن مختلفة جوا المحمية زي السبخات الملحية و التكوينات الرملية
طب ايه اهداف المحمية 
1-الحفاظ على التنوع البيولوجي و المحافظة على الطيور المهددة بالانقراض
2-المحافظة على المخزون السمكي في بحيرة المنزلة
3- المحافظة على الغطاء النباتي
4-المحافظة على جزيرة تنيس الأثرية و اللي تعتبر موئل طبيعي لطيور كتير
5-نشر الوعي البيئي بين المجتمع
6-عمل بحوث و دراسات بيئية مع الجامعات المصرية زي جامعة المنصورة لدراسة الحياة البرية و طرق تطويرها
كمان المحمية بتلعب دور كبير في توعية المجتمع زي ما قولنا في الأهداف 
فا بتعمل الآتي :
1. بتستقبل المحمية طلاب المدارس والجامعات لزيارات توعوية بيتم فيها إلقاء محاضرات وندوات عن أهمية المحميات الطبيعية ودورها في الحفاظ على البيئة.
2. المحمية كمان بتنظم دورات تدريبية ومسابقات بيئية لرفع الوعي البيئي عند المجتمع المحلي بالذات بين الشباب والأطفال.
3. وكمان عملوا متحف 
جوة المحمية بيعرض عينات من الحياة البرية والنباتية وده بيساعد الزوار يبقى عندهم فكرة ويفهموا التنوع البيولوجي للمنطقة.
4. إدارة المحمية بتشتغل مع الجمعيات المحلية لصيادي الأسماك والمزارعين لتوفير بدائل اقتصادية مستدامة زي تربية النحل والصناعات اليدوية واللي بيساهم في تحسين مستوى معيشة السكان مع الحفاظ على البيئة.
طب هو لازم نزور المحمية دي ؟
طبعا لازم تزورها .. مينفعش يبقى عندك الفرصة دي في بلدك وتفوتها … طب هنستفيد ايه لما نروح هناك
– اول حاجة هتستمتع بالمناظر الطبيعية الخلابة للطيور المهاجرة و النباتات النادرة.
– تاني حاجة هنتعلم ونعرف التنوع البيولوجي اللي عندنا واللي بورسعيد بتتميز بيه و دورها في الحفاظ عليه كمان .
محمية أشتوم الجميل مش مكان للحفاظ على الطبيعة وبس …. هي كمان مركز للتوعية والتعليم البيئي. زوروها واستمتعوا بجمال الطبيعة
جهاز شئون البيئة التابع لوزارة البيئة منزل pdf بيتكلم عن المحمية بالتفصيل ده اللينك بتاعه لو عايزين تعرفوا اكتر عن المحمية
https://www.eeaa.gov.eg/…/Files/20221213131238146.pdf