الحرارة بقت أعلى من الطبيعي الشتاء بقى مش متوقع والسيول والعواصف زادت بشكل مرعب الغابات بتتحرق الجليد بيذوب ومستوى البحر بيزيد وكل ده بسبب تصرفاتنا كمجتمعات وصناعات مش واخدة بالها من تأثيرها على الكوكب
التلوث الناتج عن المصانع والمواصلات وقطع الأشجار بيزوّد كمية الغازات الضارة في الجو وده بيخلي الأرض تسخن أكتر النتيجة محاصيل بتقل أمراض بتنتشر وموارد بتقل مع الزمن كلنا فاكرين أيام الصيف اللي كنا بنستحملها لكن دلوقتي بقت موجات الحر قاتلة والعواصف بقت تدمر مدن كاملة واكبر سببين فعليين في موضوع التغير المناخي هما
١ـ ثقب الأوزون 
٢-الاحتباس الحراري 
تعالوا نتكلم اول حاجة عن ثقب الأوزون 
الأوزون هو طبقة طبيعية في الغلاف الجوي بتحمي الأرض من الأشعة فوق البنفسجية الضارة. في الثمانينيات اكتشف العلماء أن المواد الكيميائية اللي بيصنعها البشر زي مركبات الكلوروفلوروكربون (CFCs) واللي كانوا بيستخدموها في العمليات الصناعية المختلفة… كانت بتدمر طبقة الأوزون واللي أدى إلى “ثقب” فوق القارة القطبية الجنوبية انتاركتيكا و كده الأشعة فوق البنفسجية بتدخل للأرض و يرتفع درجة حراراتها
لحسن الحظ العالم اخد خطوة في الموضوع ده عن طريق بروتوكول مونتريال 1987، اللي حظر استخدام المواد الكيميائية الضارة. ومن ساعتعا بدأت طبقة الأوزون في التعافي ببطء، لكنها لسة محتاجة عقود عشان ترجع لطبيعتها
و تاني حاجة الاحتباس الحراري
الاحتباس الحراري هو ظاهرة مختلفة تمامًا، حيث اللي بيحصل ببساطة إن الغازات الدفيئة (زي ثاني أكسيد الكربون والميثان) بتتراكم في الغلاف الجوي واللي بيأدي لاحتباس الحرارة وارتفاع درجة حرارة الأرض. الغازات دي بتنتج بشكل رئيسي من حرق الفحم والنفط والغاز و إزالة الغابات، والأنشطة الصناعية.
الاحتباس الحراري هو المحرك الرئيسي للتغير المناخي اللي بنعيشه النهاردة و ارتفاع درجات الحرارة العالمية و ذوبان الجليد وزيادة وتيرة الكوارث الطبيعية.
و كنتيجة للتغير المناخي … يناير 2025.. أدفأ شهر في تاريخ الأرض؟
وفقًا لتقرير حديث من هيئة الأرصاد الجوية العالمية، يناير 2025 سجل أعلى متوسط حرارة عالمي على الإطلاق، متجاوزًا كل الأرقام القياسية السابقة. وده مش مجرد رقم، ده معناه إن موجات الحر بقت أقوى، الفصول بقت غير مستقرة، والكوارث الطبيعية زي الفيضانات والحرائق بقت بتحصل بوتيرة أسرع وأشد.
العالم بيكسر أرقام قياسية في الحرارة بشكل متواصل، وده أكبر دليل على إن التغير المناخي بقى واقع بنعيشه، مش مجرد تحذيرات علمية. كل تأخير في التحرك لمواجهة الأزمة هيكلفنا أكتر، والوقت بيجري
وعشان كده العالم طلع بحل جديد وهو ضريبة الكربون
إيه هي ضريبة الكربون 
ضريبة الكربون معناها إن أي شركة أو مصنع بينتج غازات دفيئة زي ثاني أكسيد الكربون بيدفع ضريبة على كل طن بينتجه الفكرة هنا إن الضريبة دي هتخلّي الشركات تفكر في تقليل التلوث لأنها كل ما تلوث أكتر هتدفع أكتر فبالتالي هتبدأ تتجه لحلول أنظف زي الطاقة المتجددة
بعض الدول بدأت تطبق ضريبة الكربون زي كندا وألمانيا وفرنسا لكن لسه في دول كتير متأخرة في تطبيقها ولو اتعممت الفكرة عالميًا ممكن تكون خطوة حقيقية لإنقاذ الكوكب
الموضوع مش مجرد مشكلة بعيدة ده شيء بيأثر علينا كلنا وهتكون تأثيراته أصعب على الأجيال الجاية بس لسه في أمل الحكومات بتحاول تتحرك والشركات الكبيرة بدأت تاخد قرارات للتقليل من الانبعاثات لكن إحنا كأفراد لازم يكون لينا دور برضه
——–
مؤتمر المناخ العالمي في مصر
مصر استضافت مؤتمر الأمم المتحدة للمناخ COP27 في 2022 في شرم الشيخ وده كان حدث كبير جدًا لأن العالم كله اجتمع لمناقشة حلول التغير المناخي المؤتمر ركز على تنفيذ التعهدات السابقة وتقليل الانبعاثات الكربونية وكمان ناقش فكرة تمويل الدول النامية اللي بتتضرر أكتر من التغير المناخي رغم إنها مش السبب الرئيسي فيه
واحد من أهم الإنجازات اللي حصلت في المؤتمر كان إنشاء صندوق الخسائر والأضرار واللي هدفه مساعدة الدول اللي بتعاني من الكوارث الطبيعية بسبب التغير المناخي زي الفيضانات اللي حصلت في باكستان والحرائق اللي بتدمر الغابات في أماكن كتير
———
اتفاقيات دولية لمواجهة التغير المناخي
الحكومات من سنين بتحاول تحط حلول لمشكلة التغير المناخي وكان في اتفاقيات عالمية زي اتفاقية كيوتو 1997 اللي كانت بتحاول تلزم الدول المتقدمة بتقليل انبعاثات الغازات الدفيئة وبعدها جات اتفاقية باريس للمناخ 2015 اللي كانت خطوة أكبر لأنها بتشمل كل الدول مش بس الصناعية الكبيرة وهدفها تقليل الاحتباس الحراري لأقل من 2 درجة مئوية عن مستويات ما قبل الثورة الصناعية
لكن رغم الاتفاقيات دي التحدي الحقيقي هو التنفيذ لأن بعض الدول بتلتزم والبعض التاني مش بيوفي بتعهداته عشان كده الدول بتحاول تطبّق ضريبة الكربون كحل اقتصادي للمشكلة
———
إزاي نقدر نساعد
تقليل استهلاك البلاستيك لأنه بياخد مئات السنين عشان يتحلل
استخدام الطاقة المتجددة لو متاحة زي الطاقة الشمسية
توفير الكهرباء والمياه لأن إنتاجهم بيسبب تلوث كبير
زراعة شجر حتى لو في البلكونة لأن النباتات بتمتص ثاني أكسيد الكربون
المشي أو ركوب العجل بدل العربيات لو المسافة قريبة
هل لسه شايفين إن التغير المناخي مجرد كلام؟
طب و الحل لتغير مناخي؟
الحل مش مستحيل والتغيير مش هيحصل في يوم وليلة بس لو كل واحد فينا بدأ بخطوة صغيرة التأثير هيبقى كبير الكوكب ده بيتنا ومش هنلاقي واحد غيره فخلينا نحافظ عليه عشان نفسنا وعشان اللي جايين بعدنا
التغير المناخي بالفعل أصبح واقعًا نعيشه يوميًا، والتأثيرات التي ذكرتها مثل ارتفاع درجات الحرارة، التغيرات في الفصول، زيادة الكوارث الطبيعية كالفيضانات والعواصف، وذوبان الجليد، كلها أدلة واضحة على أن الكوكب يتغير بشكل سريع وخطير. هذه التغيرات ليست بعيدة عنا، بل تؤثر على حياتنا اليومية وصحتنا ومواردنا الطبيعية.